عن مؤشر الPSA و مدى أهميته

النهاردة هتكلم عن الPSA وهو من البروتينات اللي بتفرزها غدة البروستات ومعروف كمؤشر لسرطان البروستات بمعنى أنه لو زاد بيبقى ده مؤشر للمرض.

الPSA بيزيد بردو بسبب التهاب البروستات و مفيش دليل قاطع على أن الالتهاب ده مرتبط بالسرطان أصلا، حتى حقيقة أن الPSA في حد ذاته مشكوك فيها و فيه معلومات مهمة ناس كتير مش عارفينها.

  • فيه إحصائيات بتقول أن 25% من مرضى سرطان البروستات عندهم نسبة الPSA طبيعية ( أقل من 4 نانوجرام/مل ).
  • التقارير بتقول أن اللي عندهم غدة بروستاتا طبيعية و نسب PSA طبيعية عندهم بردو احتمالية 15% يجيلهم سرطان بروستات.
  • فيه دراسة أتعملت في كندا لقت أن 11.3% و 19.8% من اللي بيشخصوا المرض على أساس الPSA بيكون تشخصيهم غلط و 40% و 56% منهم هتجيلهم مضاعفات بعد إجراءات العلاج وهيحصل مشاكل أقلها الضعف الجنسي و الباحثين وصوا بعدم استخدام المقياس ده.
  • -فيه معلومة شائعة عن أن ارتفاع التستستيرون بتسبب سرطان البروستات أو بتزود الPSA اللي هو بيزود سرطان البروستات و أن عشان كده الأدوية أو حقن التستستيرون مثلا ( الناس اللي بتاخد منشطات ) بتسبب سرطان البروستات لكن الدراسات لقت أن مفيش علاقة بين التستستيرون والPSA أو السرطان ( مش تشجيع أن الناس تاخد منشطات بس لازم لما نتكلم عن الحاجات دي و نوصل لاستنتاجات نقول كلام حقيقي بأدلة ).


خلينا نطبق المعلومات دي عملي:


مثال 1 : فيه دراسة في 2011 لقت أن الGenistein الموجود في فول الصويا فعال للتعامل مع حاجة زي سرطان البروستات لأنه بيقلل الPSA بنسبة 7.8% بس بردو ده مش مقياس.


مثال 2 : فيه مقال أنا كنت كاتبه عن الرمان و فيه معلومة مقلتهاش و هي أن فيه دراسات استنتجت أن الرمان مفيد من ناحية سرطان البروستات لأنه مثلا بيقلل الPSA و ده كلام مش دقيق


مثال 3 : أي حد ممكن عادي جدا يعمل دعاية مثلا لمكملات الشاي الأخضر و يقول أن فيه دراسة اتنشرت في 2015 لقت أنه بيحمي من سرطان البروستات عشان بيقلل الPSA 😀


مثال 4: فيه دراسة لقت أن الأوميجا 3 والCoenzyme Q10 بيقللوا الPSA بنسبة 30% وطبعا اوميجا 3 مفيد جدا بس ده مش معناه أننا نقول أنه بيحمي من سرطان البروستات.والCoenzyme Q10 هو إنزيم بيدخل ڤيتامين B2 في تركيبه و بيتباع على هيئة مكملات و موجود كعنصر في مكملات زي Hydroxycut MAX و بيشتغل في الجسم كمضاد أكسدة و عامل مساعد لإنتاج الطاقة والهضم وحماية الجسم من السموم ومنع ظهور التجاعيد و زيادة الخصوبة وبيكون مفيد أكتر لما استخداماته بتبقى في حالات أمراض القلب والسكر وسرطان الثدي واضطرابات اللثة و ضمور العضلات ومثلا متلازمة أسمها fibromyalgia بتسبب ألم و ضعف في العضلات والمفاصل والأوتار وبالمناسبة Lady Gaga جالها المرض ده من فترة.


ممكن الCoenzyme Q10 يفيد اللي بياخدوا منشطات بالذات و فيه دراسات لقت أنه مفيد للأداء الرياضي عموما، فيه بردو دراسة لقت نجاح في علاج الزهايمر لما الباحثين عملوا تغييرات من ضمنها أنهم أستعملوا مع المرضى ڤيتامين D3 مع أوميجا 3 و Coenzyme Q10.


بالمناسبة بردو فيه دراسة يابانية لقت أن عصير الجريب فروت بيحسن امتصاص الCoenzyme Q10، و دي ممكن تكون من أسباب علاقته بطول العمر اللي اتكلمت عنها في مقال عن أهمية الفاكهة في الدايت قبل كده.


مثال 5: و ده بقى أكتر جزء كنت عايز أتكلم فيه 😀 طبعا أنا قلت قبل كده أن القلي بزيت الزيتون مثلا صحي و أن الضرر بيكون بسبب نوع الزيت مش القلي في حد ذاته و بردو فيه ناس مش مقتنعة بالفكرة.


فيه دراسة اتعملت في 2013 بتقول أن الأكل المقلي أكتر من مرة في الأسبوع بيزود خطر الإصابة بسرطان البروستات و أن أي حاجة مطبوخة على درجة حرارة عالية حتى اللحمة المشوية مثلا خطر!المقياس اللي أستعملوه في الدراسة كان الPSA و ده مش مقياس أصلا يعني الدليل ضعيف.

More Stories
أقل مدة تمرين مطلوبة لتحفيز نمو العضلات