اتكلمت عن هرمون الleptin والحاجات اللي شبهه و أنها مسئولة عن توصيل إشارات للمخ عن نسبة الدهون والأكل والحرق و كل الكلام ده، واستجابته للدايت والRefeed والحاجات اللي بتقلله و بتزوده هنا.
عرفنا أن قلة الleptin من أسباب المشاكل اللي الدايت واللي نسبة الدهون القليلة جدا بتسببها، لكن ليه مناخدش الهرمون ده في صورته الحرة طالما هو مهم كده؟
- أولًا الجرعة الفعالة سعرها ممكن يبقى ضعف سعر الGH واللي ميعرفش الGH بكام مش لازم يعرف يعني 😀
- تاني حاجة أنه غالبًا مش متاح للأستخدام الطبي أو أن أي حد يجيبه، موجود بس لأغراض البحث العلمي.
- تالت سبب والأهم هو أنه فاعليته ضعيفة أصلًا بالنسبة لسعره 😀
فيه مشكلة كمان، زي مانا قلت قبل كده ده هرمون بروتيني يعني لو بلعته مثلا هيتهضم زي أي بروتين بيروح للمعدة عشان كده لازم يتاخد حقن، و ده سبب أن فيه حاجات لازم تاخدها على شكل حقن و حاجات لا.
طبعا موضوع الحقن ده مش كل الناس بتحبه ( عارف أن فيه ناس بردو معندهاش مشاكل مع الموضوع ) يعني مثلا فيه ناس بتاخد حقن إنسولين عشان أسباب ليها علاقة بزيادة الكتلة العضلية لكن فيه ناس بتاخد حقن الإنسولين بسبب مرض السكر لأنهم مش عايزين يموتوا، والبحث العلمي شغال عشان حد يوصل لبديل لحقن الإنسولين لكن طبعًا اللي بياخده لغرض تاني مش فارق معاه الكلام ده.
الدراسات اللي اتعملت عالفيران لقوا فيها أن حقن الleptin مش فعالة، بس على فكرة فيه دراسات لقت أنها مفيدة فعلا و بتجيب نتيجة كويسة لكن الدراسات دي على ناس نسبة دهونها عالية جدا مش ناس نسبة دهونها قليلة أصلا وعايزة تحافظ عليها وتقللها أكتر، زي مثلا دراسة اتعملت في 2011 على ستات لما استعملوه خسروا 19% من نسبة دهونهم في 10 أسابيع وكمان الباحثين استعملوا الDXA Scan في القياس ( طريقة دقيقة في قياس نسبة الدهون أتكلمت عنها قبل كده )
الإجابة بردو عشان نوصلها لازم نفهم حاجات كتير الأول، تخيل أنك جزئ leptin بتعوم في مجرى الدم وبتتفاعل مع الأنسجة الدهنية والعضلية 😀 عشان تعمل كده هتحتاج Receptors أو مستقبلات معينة و ده بينطبق على أي هرمون في الجسم و فيه مستقبلات مرتبطة بأكتر من هرمون واحد بس ده مش موضوعنا دلوقتي.
الكلام ده معناه أن فيه مستقبلات للإنسولين والجلوكوز ولمخازن الجليكوجين و فيه مثلا Androgen receptors مرتبطة بالتستستيرون، و فيه مستقبلات لتخليق البروتين في الجسم عشان الكتلة العضلية تزيد، و فيه Estrogen receptors لهرمون الEstrogen ( هرمون الأنوثة ) و حاجات ليها علاقة بدهون الجسم، و دي مقدمة بردو لحاجات هتكلم عنها أكتر في الفترة الجاية عشان أكمل إجابة السؤال.
ملاحظات بسيطة:
- ڤيتامين D مهم للandrogen receptors يعني النقص فيه بيعمل مشكلة.
- فيه دراسة لقت أن معدن الBoron “ممكن” يزود الandrogen receptors و ده موجود في مكملات زي Six star testosterone booster ( غالي عالفاضي وتأثيره مش زي سعره ) و موجود كمان في العنب الأحمر، و بردو فيه دليل على أن العنصر ده بيحافظ على هرمونات الأنوثة بعد انقطاع الدورة الشهرية عند الستات و بيحميهم من مشاكل زي خسارة العظام.
- References
- 1. Bromocriptine: An Old Drug with New Uses by Lyle McDonald
- 2. Brinkoetter M, Magkos F, Vamvini M, Mantzoros CS. Leptin treatment reduces body fat but does not affect lean body mass or the myostatin-follistatin-activin axis in lean hypoleptinemic women. Am J Physiol Endocrinol Metab 301: E99–E104, 2011
- 3. Wehr E, et al. Association of vitamin D status with serum androgen levels in men. Clin Endocrinol (Oxf) 2010;73(2):243-8.
- 4. Proal AD, Albert PJ, et al. Dysregulation of the vitamin D nuclear receptor may contribute to the higher prevalence of some autoimmune diseases in women. Ann N Y Acad Sci 2009;1173:252-9.
- 5. Kadi F, Bonnerud P, Eriksson A, Thornell LE. The expression of androgen receptors in human neck and limb muscles: effects of training and self-administration of androgenic=anabolic steriods. Histochem Cell Biol. 2000 Jan;113(1):25-9.
- 6. Naghii, M. R., et al.  Comparative effects of daily and weekly boron supplementation on plasma steroid hormones and proinflammatory cytokines. J Trace Elem Med Biol. 2011 Jan;25(1):54-8