هل بتعاني من مشكلة في النوم بالليل؟
دي 3 أخطاء شائعة للأكل قبل النوم ممكن تكون السبب ولو بتعملها المفروض تبدأ تبعد عنها!
-الكافيين في وقت متأخر من اليوم
شيء حتمي أن الكافيين يأخر معاد نومك حتى لو أنت بتعرف تنام بعد ما تشرب قهوة ده هيأثر على جودة نومك.
وقت النوم جسمك بيستغله عشان يعمل Recovery من التمرين و من غير ما تنام كويس هرموناتك مش هتتفرز بشكل سليم و هيأثر على بناء عضلاتك
الحل أنك تبعد عن أي حاجة فيها كافيين ( شاي – قهوة – نيسكافيه – مشروبات طاقة زي الريدبول – بيبسي ) 6 ساعات قبل النوم مثلاً عشان يبقى وقت كفاية ان نومك يبقى سليم.
-أنك تتجنب الكاربوهيدرات قبل النوم
ناس كتير فاكرة أن لما تاكل كارب قبل النوم هيزيد وزنها، والكلام ده مش صح لأن زيادة أو خسارة الوزن حاجة مرتبطة باللي أكلته خلال اليوم مش وجبة واحدة بس و ده اتكلمت عنه قبل كده!
الحل أنك متخافش من الكربوهيدرات قبل النوم، لأن في الحقيقة الدراسات (1,2) أثبتت فاعلية أكبر في التخسيس لما الناس بتاكل كارب قبل النوم!
غير كده كمان إحساس الجوع والراحة بيزيد .. هل ده سبب أنك تستغنى عن الكاربوهيدرات بالنهار؟
لأ بس ده توضيح أن زيادة الوزن بتتحكم بيه الكالوريز خلال اليوم مش الكاربوهيدرات زي ما فيه ناس بتقول من غير علم، وكنت قولت في مقال ليا قبل كده أن اللي بياكلوا 80% من الكارب بالليل بيجوعوا أقل.
-اختيارات غلط لوجبة قبل النوم
الأكل المملح مثلاً بيأثر بصورة كبيرة على النوم، وده من خلال تجربة شخصية مع المكسرات المالحة و أسماك زي الرنجة كانت بتأثر على نومي بالسلب.بجانب أن الدراسات بتقول كده.