المقال ده هيبقى الكلام فيه بالتفصيل شوية عن موضوع تحسين الصحة و زيادة حرق الدهون باختيار الأكل في الدايت.
هتكلم عن:
- الغدة الدرقية وعلاقتها بحرق الدهون وازاي نزود العملية دي؟
- الkaempferol و مصادرها في الأكل والمكملات؟
- ليه مينفعش تاكل البيض ني؟
- هل نصيحة شرب اللبن بالبيض مفيدة؟
- هل نصيحة الزبادي بالليمون للتخسيس ممكن تكون فعالة؟
- الOleuropein ومصادره في الأكل والمكملات؟
- مدى اهمية زيت الزيتون و احسن نوع ممكن تستعمله؟
- هل القلي بزيت الزيتون صحي؟
- اهم الڤيتامينات اللي انت محتاجها؟
عشان نبدأ لازم نعرف ايه هي الغدة الدرقية او الThyroid Gland؟
الغدة الدرقية باختصار هي غدة في الجسم بتفرز هرمونات T3، T4 و دي مهمة لنمو وتطور الخلايا والجهاز العصبي، الغدة دي ليها دور في تنظيم عمليات الحرق و رفع درجة حرارة الجسم و حرق الكالوريز (مصدر).
فيه مركب اسمه kaempferol بيحفز إنتاج هرمونات الغدة الدرقية، وكمان بينشط انسجة اسمها Brown adipose tissues و ده بيعمل زيادة في استهلاك الطاقة و حرق الدهون وتوازن بين الإنسولين والGlucagon اللي بيحافظوا على مستويات السكر في الدم، و فيه فرضيات كمان عن أنه بيساعد في الحماية من السرطان (1,2)
لكن أيه مصادر الKaempferol في الأكل؟
- اللوز
اللوز موجود فيه ڤيتامين B2 و ده ضروري جدا لأكسدة الدهون وعمليات كتير في الجسم زي التمثيل الغذائي للبروتين، وڤيتامين B7 اللي النقص فيه بيعمل انيميا وتساقط للشعر ومشاكل كتير ومن أسباب النقص فيه على فكرة أن حد ياكل البيض ني لأنه بيمنع أمتصاص الڤيتامين ده وانا شفت مدربين في الجيمات بينصحوا الناس تشرب البيض ني وبشوف ناس كتير بتعمل خلطات غريبة كده و معندهومش فكرة قد ايه ده مؤذي 😀
اللوز كمان غني بالماغنسيوم، والماغنسيوم مهم جدا لأنه بيدخل في عمليات هضم البروتين والكربوهيدرات والدهون وانقباض العضلات ونقل الإشارات للجهاز العصبي المركزي ومئات العمليات التانية ومهم كمان للنوم وعلاج الأرق.
كمان اللوز غني بالMonounsaturated Fatty Acids أو الدهون الأحادية غير المشبعة ( اسمها بردو Oleic Acid او أوميجا 9 ) و فيه دراسة لقت ان استهلاك الدهون دي بيزود الحرق ويحسن المزاج و يعلي النشاط.
- الجريب فروت
فيه دراسة مجمعة اتعملت قريب وكانت عبارة عن مراجعة لأهمية الفاكهة والخضار في تحسين الصحة وعلاقتهم بطول العمر، وكان فيه ليست حاطينها و سجلوا فيها ان الجريب فروت والتفاح والحمضيات من احسن انواع الفاكهة من الناحية دي، والبروكلي من أحسن انواع الخضار اللي بيحمي من أمراض القلب والسرطان.
بردو الدراسات اثبتت فاعليته في التحكم في مستويات السكر في الدم و ده بردو ممكن نرجعه للkaempferol اللي موجود فيه.
- الحمضيات
لو حد متابع اللي انا بكتبه ممكن يكون فاكر المقال اللي كتبته عن الكافيين مع السينفرين اللي هو مستخلص البرتقال واتكلمت عن فوايد الحمضيات والمكملات اللي موجود فيها المادة دي.
وجود السينفرين في الحمضيات مش الحاجة الوحيدة اللي بتساعد على حرق الدهون لكن كمان الkaempferol اللي فيه.
كمان مكمل Hydroxycut SX-7 Black Onyx فيه مركز برتقال حمضي مضاد للاكسدة اسمه Citrus Unishu بيساعد على تقوية العظام.
فيه بردو ناس كتير بتحاول تخس بطرق غريبة ملهاش اساس علمي زي الزبادي بالليمون و شرب عصير ليمون كتير 😀
لكن ده في الحقيقة ممكن يكون مفيد -مع الدايت- بسبب الkaempferol وكمان الليمون مفيهوش غير 29 كالوري لكل 100 جرام، و أنا بخلي المتدربين يشربوا عصير ليمون بسكر دايت بكمية مفتوحة و بلاحظ أن الطريقة دي بتجيب نتيجة في منع الجوع و زيادة معدل الحرق.
الجريب فروت كمان من الحمضيات على فكرة.
- السبانخ
بجانب وجود الkaempferol بردو السبانخ فيها ڤيتامين B1 و ڤيتامين A و دي ڤيتامينات ضرورية لنقل الأكسچين للعضلات، وكنت قلت ده في المقال اللي كتبته عن شرب القهوة بعد التمرين.
-فيه كمان بجانب هيدروكسي كت مكملات زي Ginkgo Biloba و Six Star Testosterone Booster فيها Kaempferol.
- الشاي الأخضر
الشاي الأخضر فيه kaempferol و بردو Animal Cuts مفيد جدا من الناحية دي لأنه فيه كميات كبيرة من معظم المواد اللي اتكلمت عنها، و فيه انواع شاي مختلفة بتدخل في تصنيعه.
- البروكلي
ده من اهم الحاجات اللي لازم تبقى موجودة عندك في الدايت لأنه غني بڤيتامين سي و فيه مادة الGlucosinolate اللي ليها دور في الحماية من السرطان.
هتكلم بقى عن الOleuropein و ده مضاد أكسدة بيزود إنتاج بروتين مسئول عن أستهلاك الطاقة و حرق الكالوريز.. من اهم مصادره زيت الزيتون ( Extra virgin olive oil بالتحديد ).
زيت الزيتون فيه حاجات كتير مهمة زي الpolyphenols اللي ليها دور في ظبط مستويات الإنسولين في الدم و زي الMonounsaturated fats ( Oleic Acid ) اللي كنت اتكلمت عنها لما كنت بتكلم عن اللوز من شوية
كمان فيه ڤيتامين E و ده مهم عشان بيحافظ على اغشية الخلايا فتفضل سليمة و بناء العضلات محتاج الاغشية السليمة دي ( ڤيتامين E موجود كمان في Animal Pak والMultivitamins ) و دي ڤيتامين ذائبة في الدهون يعني محتاجة دهون عشان الجسم يستفيد منها، و عشان كده زيت الزيتون من الدهون المفيدة لامتصاص الڤيتامين ده و ڤيتامينات تانية زي A – D – K ومجموعة الڤيتامينات ده أسمها Fat soluble Vitamins و ده بردو دليل على أن الدهون مهمة و ان محدش ينفع يلغي الدهون من الدايت لأن فيه حالات وفاة مرتبطة بالموضوع ده.
فيه كمان دراسات اثبتت أن الحاجات اللي في زيت الزيتون ليها دور في الحماية من امراض زي السرطان.. كمان بيساعد على إفراز السيروتونين ( ناقل عصبي بيساعد على تحسين المزاج و سد الشهية ).القلي بزيت الزيتون صحي و مش هرغي كتير في الموضوع بس هحط دراسة أختبرت زيت الزيتون في الحرارة لمدة 24 ساعة متواصلة!