تمرين العضلة عدة مرات اسبوعيًا

-هل العضلة بتتحرق؟
-هل تمرين العضلات الكبيرة يومين في الأسبوع بيصغرها؟
-هل 30 مجموعة صدر في يوم واحد أفضل من تقسيمهم على يومين؟

اسئلة كتير زي دي للأسف اللي جاوبوا عليها هما السبب في تجهيل الناس و نشر أفكار غلط مش مبنية على دراسات ولا أبحاث ولا حتى تجارب شخصية، وانا هقول عكس الإجابات دي!

في البداية خلينا نتكلم عن أن التقسيم التدريبي نوعين هما Split workout و Full body workout

-split
ده اللي المفروض احنا بنلعبه لما نقسم الجدول يوم كتف و يوم ضهر و يوم دراع..إلخ أو يوم صدر و تراي يوم ضهر و باي يوم كتف و رجل.


التقسيم ده ظهر في التمانينات لما المحترفين وقتها كانوا عايزين يركزوا على عضلة أو عضلتين في المرة الواحدة فكانوا ممكن يمرنوا العضلة 5 ساعات و يتمرنوا تمرين الصبح و تمرين بالليل مع المنشطات و كمية أكل رهببة على مدار اليوم عشان يلعبوا مثلًا 60 مجموعة صدر في الأسبوع!

-Full body
التقسيم ده أساس رياضة كمال الأجسام من الأزل لحد التمانينات و هو شبه الجينرال و عبارة عن 3 أو 4 أيام في الأسبوع لكن اليوم الواحد تمرين لكل عضلات الجسم و بيمرن الجسم كله اكتر من مرة في الأسبوع.

-اتمرن split workout ولا Full body workout؟
مبدئيًا كده أحب اصدمك بأن اللي احنا بنعمله في الجيم ده مش معترف بيه انه split ولا أي حاجة شبهه حتى!
ده لأننا ببساطة بنمرن العضلة مرة في الأسبوع عشان نستنى اسبوع كامل من غير تمرين و ده مفيش حد فاهم بيعمله!


المشكلة التانية اننا لما نتكلم عن اللي بيتمرنوا 3 أيام في الأسبوع و بيلعبوا الباي مع الضهر و التراي مع الصدر فالغلطة هنا اننا بنهلك الباي كعضلة مساعدة مع الضهر بعدها نعزلها في تمارين الباي.
فالحل في التمرين صدر و دراع مثلًا أو يوم للصدر والتراي و يوم للصدر والباي بحيث ان عضلة العضلات الصغيرة متتعبش قبل تمرين العزل و نكون بكده مرننا العضلة يومين في الأسبوع من غير حتى ما نحتاج يوم للدراع لوحده (لاحظ إن إرهاق التراي استثناء للقاعدة و انها حاجة مفيدة كتبت عنها قبل كده )

-هل العضلة هتتحرق؟
زي ما قولت كلام مش مبني على أي حاجة والدليل دراسة بتوضح فايدة الFull body workout.


فيه دراسة إيرانية قسموا فيها ناس ل3 مجموعات.

  • مجموعة بتتمرن 12 تمرين Full body مرة في الأسبوع.
  • مجموعة بتعمل 6 تمارين مرتين في الأسبوع.
  • مجموعة تالتة بتعمل 4 تماربن 3 مرات في الأسبوع.

النتيجة إن النصيب الأكبر في الزيادة كان للي اتمرنوا مرتين و تلاتة لكن لقوا ان اللي اتمرنوا 3 مرات زيادتهم كانت طفيفة عن اللي اتمرنوا مرتين.

-يعني ممكن أمرن عضلة يوم و يوم أو كل يوم عادي؟
الموضوع بيعتمد على قدراتك و أكلك و جسمك و مستواك و هل انت طبيعي ولا بتاخد منشطات، لكن اللي اقدر اقوله ان متسيبش نفسك اسبوع من غير ما تبقى مرنت العضلة الواحدة يومين عالأقل.


الجدير بالذكر إن فيه راجل اسمه cory gregory كان عامل برنامج تدريبي بيلعب فيه اسكوات كل يوم لمدة 30 يوم و دي تمرينة أنا بنصح بيها اللي بيعاني من ضعف و تأخر في عضلات الرجل، و طبعًا في الرجل بنصح بالتمرين بأسلوب الGVT اللي كتبت عنه مقال قبل كده.

شوف برضو
السردين والتخسيس وبناء العضلات