أفضل نسبة بروتين للتخسيس أو بناء العضلات

أيه هي كمية البروتين اللي انت محتاجها كل يوم فعلا؟


فيه دراسة في 2017 قالت أن الكمية المطلوبة هي 1.6 لكل كيلو من وزن الجسم و كله كان بيتكلم عنها لما نزلت، لكن قبلها كان فيه دراسة محدش خد باله منها تقريبًا كانت أتعملت من 2013 قسمت المتطوعين ل3 مجموعات

  • المجموعة الأولى خدت 0.8g لكل كيلو
  • التانية 1.6g
  • التالتة 2.4g


النتيجة أن المجموعة بتاعت 1.6g خست دهون أكتر من 2.4g والاتنين خسوا أكتر من 0.8g يعني زيادة كمية البروتين عن 1.6 جرام مش بس ملهاش لازمة لكن ممكن كمان تخلي نتايجك أقل-الخسارة النسبية اللي في العضلات مع دايت فيه 2.4 جرام لكل كيلو مفرقتش عن 1.6 جرام و في نفس الوقت مفيش اي thermogenic advantage (تأثير زيادة من ناحية حرق الدهون)

و على فكرة فيه دراسة تانية من 2001 بتتكلم عن فايدة زيادة كمية البروتين في الأكل لحد 1.6 جرام وكانت بردو للرياضيين!

اللي بعمله مع المتدربين هو أني بمشي ب1.6 جرام بروتين لكل كيلو ولو لقيت ان الكتلة العضلية ثابتة أو بتقل بزود تدريجيًا لكن في معظم الحالات النسبة دي بتجيب أفضل نتيجة، و كل قاعدة ليها استثناء طبعًا بعيدًا عن دعاية شركات المكملات.

واللي عايز أقوله أن فيه حاجات أهم بكتير من أنك تفكر هل انت محتاج 1.6 جرام بروتين ولا 1.7؟ زي التفكير في مدي فاعلية تمرينك و زيادة أوزانك و نومك والعناصر التانية في الدايت زي الدهون والكربوهيدرات والڤيتامينات والمعادن والأكل قبل وبعد التمرين وتفاصيل عايزة تركيز أكتر صدقوني.

شوف برضو
هل تمرين الرفرفة الأمامي فعال لعزل الكتف الأمامي؟